कांग्रेस नेता खुमबहादुर खड्का अस्पतालको शय्यामा
काठमाडौं,चैत्र ९। नेपाली कांग्रेसका नेता खुमबहादुर खड्काको भारतको नयाँदिल्लीस्थित एपोलो अस्पतालमा उपचार भइरहेको छ । खड्काको स्वास्थ्य स्थिति झन्बिग्रिँदै गएपछि भेन्टिलेटरमा राखेर उपचार शुरु गरिएको छ ।
मिर्गौला, छाती र नसाको समस्याबाट पीडित खड्कालाई बुधबारबाट भेन्टिलेटरमा राखेर उपचार शुरु गरिएको एपोलो अस्पतालको काठमाडौंस्थित सूचना केन्द्रका प्रमुख अर्जुनबहादुर चन्दले जानकारी दिए ।
मिर्गौला प्रत्यारोपण गरेका खड्काको स्वास्थ्यमा समस्या देखिएपछि गत फागुन पहिलो साता नयाँदिल्ली लगिएको थियो ।
स्वास्थ्य लाभको कामना गर्दै दाङमा पूजाआजा
नेपाली कांग्रेसका प्रभावशाली नेता खुमबहादुर खड्काको शीघ्र स्वास्थ्य लाभको कामना गरेर उनको गृहजिल्ला दाङमा पूजाआजा गरिएको छ । दाङको विजौरी र कोठरीसहितका विभिन्न मन्दिरहरुमा नेता खड्काको स्वास्थ्य लाभको कामना गरेर बिहीबार पूजा गरिएको हो ।
‘खुमबहादुर खड्काकै कारण दाङ जिल्लाले आˆनो परिचय पायो । विकास पायो’, ‘रोगसँग उहाँले संघर्ष गरिरहनु भएको छ । उहाँको स्वास्थ्य लाभको कामना गरेर स्थानीयले मन्दिरमा पूजा गरेका हुन् ।’ कांग्रेसका स्थानीय नेता दीपकजंग पाण्डेले जानकारी दिए ।
यो समाचार न्युज २४ नेपालबाट लिईएको हो।
