०९ कात्तिक , विराटनगर – लोक आस्थाको पर्व छठ मोरङमा पनि उल्लासमय वातावरणमा मनाउने तयारी गरिएको छ । कात्तिक शुक्ल षष्ठी तिथि आज अस्ताउँदो सूर्यलाई व्रतालुले अर्घ अर्पण गर्छन् । भोलि बिहान उदाउँदो सूर्यलाई अर्घ अर्पण गरेपछि पर्वको समापन हुन्छ । यस जिल्लाका विभिन्न पोखरी, खोला, नदीका साथै नहरको डिललाई छठ पर्व मनाउनेले सफासुग्घर गरी सजाउने कार्यमा तल्लीन छन् ।
गत वर्ष झैँ यस वर्ष पनि विराटनगरका विभिन्न पोखरी, सिग्याही खोला, केशलिया नदीका साथै सुनसरी, मोरङ, सिँचाइ आयोजनाको नहरको डिलमा छठ पर्व मनाउने तयारी गरिएको छ । विभिन्न ठाउँमा आज पनि बिहानैदेखि पूजास्थलमा सफासुग्घर गर्ने कार्यमा युवा जुटेको देखिन्छ ।
षष्ठी माता अर्थात् छठ माताका साथै सूर्यदेवको पूजा गरेको खण्डमा आरोग्य प्राप्त हुने र परिवारको सुख, समृद्धि र परिवारको कल्याण हुने विश्वासका साथ यो पर्व मनाउने गरिन्छ । मैथिल, थारू, झागड, राजवंशी, मारवाडी, नेपाली भाषाभाषी, गनगाईंलगायतले बडो श्रद्धाका साथ यो पर्व मनाउने गरिएको हो ।
समानता, एकता र आपसी सम्बन्धलाई प्रगाढ बनाउनमा यो पर्वको मुख्य विशेषता रहेको यस पर्वमा सबै वर्ग, समुदाय एकै ठाउँमा बसेर सूर्यको पूजा गर्ने गरिन्छ । यस पर्वको माध्यमबाट आपसी सम्बन्धलाई प्रगाढ बनाउने तथा भेदभावलाई अन्त्य गर्ने सन्देश पनि दिएको छ ।
रासस
