२९ कात्तिक , नगरकोट – नेपाली काँग्रेस भक्तपुर निर्वाचन क्षेत्र नं २ प्रतिनिधिसभाका उम्मेदवार दमननाथ ढुङ्गानाले नेपाल मजदुर किसान पार्टीसँग मंसिर २१ गते हुने प्रतिनिधि र प्रदेशसभाको निर्वाचनमा आफूलाई सहयोग गर्न आग्रह गर्नुभएको छ ।
रफत सञ्चार क्लबद्वारा आज आयोजित साक्षात्कार कार्यक्रममा उहाँले सके आफ्ना पार्टीका उम्मेदवारीलाई जिताउन र नसके अन्य राम्रा उम्मेदवारलाई सहयोग गर्न आग्रह गर्नुभयो ।
निर्वाचन खर्च दैनिक महङ्गो हुँदै गएको प्रति चिन्ता व्यक्त गर्दै उहाँले सामान्य व्यक्तिले अब निर्वाचन लड्न नसकिने अवस्था आएको बताउनुभयो । काँग्रेस भक्तपुर १ नं निर्वाचन क्षेत्रका उम्मेदवार बाबुराजा जोशीले भक्तपुर नगर र चाँगुलाई सांस्कृतिक क्षेत्र र नगरकोटलाई पर्यटकीय क्षेत्रका रुपमा विकास गर्न आफ्नो उम्मेदवारी भएको बताउनुभयो ।
कार्यक्रममा काँग्रेस भक्तपुर निर्वाचन क्षेत्र नं १ प्रदेशसभा (क)का उम्मेदवार जीवन खत्री, (ख)का उम्मेदवार अनिल भुजु, निर्वाचन क्षेत्र नं २ (ख) का उम्मेदवार गणेशमान चक्रधरले लोकतन्त्र रक्षाका लागि काँग्रेसले निर्वाचन जित्नुपर्नेमा जोड दिनुभयो ।
रासस
