नेपाल समाचापत्र
भक्तपुर
कालो पृष्ठभूमिमा सेतो अक्षरले लेखिएको ‘पेट्रोलियम पदार्थमा गरिएको मूल्यवृद्धिको विरोध जुलुस तथा सभा’ ब्यानरको पछि स्कुल युनिफर्ममै देखिएका एक विद्यार्थीले नारा लगाए– ‘ओली तिम्रो पाराले’।
स्कुले युनिफर्ममै विरोधमा उत्रिएका उनलाई सरकारले पछिल्लो समयमा गरेको मूल्यवृद्धि त्यति चित्तबुझ्दो थिएन, सोही कारण उनी विरोध कार्यक्रममा सहभागी भएका हुन्।
उनलाई जस्तै धेरैलाई नेकपाका अध्यक्ष केपी ओली नेतृत्वको सरकारले गरेको मूल्यवृद्धि मन परेको छैन। त्यही कारण उनलाई साथ दिइरहेका थिए– ‘दुःख पायो साराले⁄’ भनी।
उनकै अधुरो नारालाई पूरा गर्दै थिए। उनैलाई पछ्याउँदै साथ दिएका थिए, स्कुल युनिफर्ममै आएका उनका सहपाठीदेखि, झण्डा बोकी आएका अरू विद्यार्थी, युवा, शिक्षक तथा आम उपभोक्ताले। ओली सरकारले गत जेठ १९ गतेबाट लागू हुने गरी पेट्रोलियम पदार्थमा गरेको मूल्यवृद्धि विरुद्ध बुधबार आन्दोलनमा आएका विद्यार्थी तथा युवाहरूले संयुक्तरुपमा मूल्यवृद्धि तत्कालै खारेज गर्न माग गरेका छन्।
यसको सर्वत्र विरोध भइरहेको छ। यो विषयमा नेपाल विद्यार्थी संघले पनि आन्दोलन थालेको छ। संघले सोमबारै भक्तुपरका प्रजिअलाई ज्ञापनपत्र बुझाइसकेको छ। बुधबार प्रजिअ कार्यालय घेराउ गर्न आएका युवा तथा विद्यार्थीले कम्युनिस्ट नामको सरकार हुँदा पनि मूल्यवृद्धि र कालोबजारीको समस्या विकराल बन्दै गएको बताउँदै भक्तपुरका प्रमुख जिल्ला अधिकारी नारायण भट्टमार्फत् प्रधानमन्त्रीको ध्यानाकर्षण गराउन ज्ञापनपत्र पनि बुझाए।
भक्तपुरको कमलविनायक, च्याम्हासिँह, सूर्यमढी, दत्तात्रय, गोलमढी, सुकुलढोका, साकोठा, दरबारस्क्वायर हुँदै जिल्ला प्रशासन पुगेका उनीहरूले कालाबजारीयालाई कारबाही गर्न, भ्रष्टाचारीलाई सजाय दिन पनि माग गरे।
नेपाल क्रान्तिकारी युवा संघ र नेपाल क्रान्तिकारी विद्यार्थी संघ भक्तपुरले आयोजना गरेको सो कार्यक्रममा बोल्दै युवा अध्यक्ष मीन बाटाले सरकारकै निकम्मापनका कारण मूल्यवृद्धि भएको र जनताले सास्ती भोगेको बताउँदै मूल्यवृद्धि फिर्ता नगरे अझ सशक्त आन्दोलन गर्ने चेतावनी दिए।
‘हामी आजबाट सांकेतिक विरोधमा उत्रिएका छौं। हाम्रो जायज मागलाई बेवास्ता गरिएको खण्डमा हामी अझ कडा आन्दोलनमा उत्रिन्छौं।’ प्रजिअलाई ज्ञापनपत्र बुझाएपछि आयोजित सभामा उनले भने।
यो समाचार न्युज अफ नेपालबाट लिईएको हो ।
