प्योङयाङ।
उत्तर कोरियाली नेता किम जोङ उनले महिलालाई बढी सन्तान जन्माउन आग्रह गरेका छन्। सामाजिक सञ्जालमा भाइरल भइरहेको भिडियोमा किमले आँसु पुछ्दै देशको घट्दो जन्मदरसँग जुध्न प्रयास गर्न आह्वान गरेको देखियो।
भिडियोमा उनी तल हेरेर आँसु पुछिरहेको देखिन्छ । कार्यक्रममा उपस्थित दर्शकमाझ धेरैले आँसु बगाएको पनि भिडियोमा देखिएको छ ।
अन्तराष्ट्रिय सञ्चार माध्यमका अनुसार गत आइतबार प्योङयाङमा आमाहरूका लागि आयोजित एक कार्यक्रममा किमले भने, ‘जन्मदरमा आएको गिरावटलाई रोक्न र बच्चाहरूको राम्रो हेरचाह गर्नु हाम्रा सबै गृहकार्यका जिम्मेवारीहरू हुन्, जुन हामीले आमाहरूसँग काम गर्दा सम्हाल्नु पर्छ।’ उनले राष्ट्रिय शक्तिलाई सुदृढ गर्नका लागि आमाहरूलाई पनि धन्यवाद दिए।
किमले साे क्रममा भने, ‘जब मलाई पार्टी र राज्यको काम गर्न गाह्रो हुन्छ, म सधैं आमाको बारेमा सोच्दछु।’
संयुक्त राष्ट्र जनसंख्या कोषले अनुमान गरेको छ कि २०२३ सम्म उत्तर कोरियामा प्रजनन दर वा महिलाबाट जन्मने बच्चाहरूको औसत संख्या १.८ हुनेछ। यो पछिल्ला दशकहरूमा प्रजनन दरमा देखा परेको ठूलो गिरावट हो ।
यो समाचार न्युज अफ नेपालबाट लिईएको हो ।
