काठमाडौं ।
पर्यटन व्यवसायी महिलाहरुको चुनौति र अवसर विषयक कार्यशाला पोखरामा सम्पन्न भएको छ । शनिबार पोखरामा पर्यटन व्यवसायी महिला संघ, नेपाल (टेवान), युरोपियन युनियन, नेपाल सरकार र जिआईजेड संस्थाको आयोजनामा पर्यटन व्यवसायी महिलाहरुको कार्यशाला सम्पन्न भएको हो ।
पोखराको लेकसाइड रिट्रिट होटलमा भएको कार्यक्रम नेपाल सरकारको उद्योग, वाणिज्य तथा आपूर्ति मन्त्रालय र युरोपियन युनियनको ‘ट्रेड एण्ड इन्भेष्टमेन्ट’ कार्यक्रम अन्तर्गत सञ्चालन गरिएको हो । गण्डकी प्रदेशका सबै जिल्लाका पर्यटन व्यवसायी महिलाहरुको सहभागिता रहने गरी आयोजना गरिएको कार्यक्रममा पर्यटन क्षेत्रका महिलाहरुको सीप र नेतृत्व क्षमता अभिवृद्धि तथा आगामी चुनौति र अवसरका विषयमा ‘पेपर प्रिजेन्टेसन’ र अन्तरक्रिया कार्यक्रम गरिएको हो ।
कार्यक्रममा बोल्दै उद्योग, वाणिज्य तथा आपूर्ति मन्त्रालयका उपसचिव भक्तराज जोशीले पर्यटन क्षेत्रका महिलाहरुमा अवसर र चुनौति बराबरी रहेका कारण सबै सरोकारवाला संघ संस्था, सरकार तथा निजी क्षेत्र मिलेर काम गर्नुपर्ने बताए । उनले सरकार सँधै महिलाहरुको समान सहभागिता र अवसरका विषयमा जिम्मेवार भएको भन्दै आगामी दिनमा यसलाई अझ धेरै अवसर प्राप्तिमा गम्भीर भएर लाग्ने पनि बताए ।
यस्तै कार्यक्रममा युरोपियन युनियनका वरिष्ठ कार्यक्रम प्रबन्धक भीम हमालले पोखरामा पर्यटन व्यवसायी महिलाहरुको अवसर र चुनौति धेरै भएकाले यस किसीमका कार्यक्रम ईयूले गण्डकी प्रदेशका सबै महिलाहरुलाई समेटेर पोखरामा ल्याएको बताए । उनले आगामी दिनमा टेवान लगायत पर्यटन व्यवसायी महिलाहरुसँग मिलेर अझ धेरै काम गर्न हौसला मिलेको पनि जानकारी दिए ।
यस्तै टेवानका अध्यक्ष कमला गिरीले पोखरामा पर्यटन महिला व्यवसायीहरुका लागि उद्योग मन्त्रालय, ईयू र जिआईजेडसँग काम तथा कार्यक्रम गर्न पाउनु नयाँ अवसर भएको भन्दै अझ धेरै महिलाहरुलाई आफ्नै सीप, क्षमता र रोजगारी सिर्जना गर्ने पर्यटन क्षेत्रमा अग्रसर गराउन यो कार्यक्रम फलदायी हुने बताइन् ।
कार्यक्रममा ईयूका वरिष्ठ सल्लाहकार शिवराज भट्टले गण्डकी महिला पर्यटन व्यवसायी तथा नेतृत्वका अवसर र चुनौतिका विषयमा ‘पेपर प्रिजेन्टेसन’ गरेका थिए । कार्यक्रममा पोखराका पर्यटन व्यवसायीका साथै टान, हान, नाट्टा, पीटीसी लगायत संघ संस्थाका प्रमुख तथा प्रतिनिधिले पनि आफ्नो विचार राखेका थिए ।
यो समाचार न्युज अफ नेपालबाट लिईएको हो ।
