बैतडी ।
प्रधानमन्त्री कप पुरुष एकदिवसीय राष्ट्रिय क्रिकेट प्रतियोगिताको सुदूरपश्चिम प्रदेशस्तरीय छनोटअन्तर्गत इलाइट च्याम्पियनसिपमा कञ्चनपुरले लगातार तेस्रो जित निकालेको छ। तेस्रो जित दर्ता गर्ने क्रममा कञ्चनपुरले बुधबार अछामलाई ६ विकेटले हरायो।
जितका लागि पाएको ९० रनको सामान्य लक्ष्य कञ्चनपुरले १७.२ ओभरमा ४ विकेटको क्षतिमा पूरा गर्यो। जसमा किरन ठगुन्नाले ३१ र प्रकाश पाण्डेले अविजित २५ रनको योगदान गरे। अछामका रोहित खड्काले २, युवराज खत्री र अभिषेक चौधरीले १/१ विकेट लिए।
यसअघि, फाप्ला मैदानमा बिहान ९ बजेदेखि शुरू हुने भनिएको ५० ओभरको खेल बाक्लो हुस्सु लागेकाले निर्धारित समयभन्दा ढिला शुरू हुँदा २८ ओभरमा झारिएको थियो।
अछामले टस जितेर पहिला ब्याटिङ गरेको २३.२ ओभरमा ८९ रनमा समेटियो। उसका सुरज तिरुवाले ३० तथा युवराज खत्रीले २० रन बनाउनुबाहेक अन्यले दोहोरो अंकमा रनसमेत जोड्न सकेनन्। अछामलाई सस्तैमा समेट्न कञ्चनपुरका दीपक चन्द एक्लैले ५ विकेट लिए । यस्तै, भरत चन्दले ३ विकेट झारे।
यो जितसँगै कञ्चनपुरले ६ अंकका साथ शीर्ष स्थानमा पुग्दै फाइनलको सम्भावना बलियो बनाएको छ। कञ्चनपुरले अब अन्तिम खेल शनिबार बैतडीसंग खेल्नेछ । लगातार तेस्रो हार व्यहोरेको अछाम भने प्रतियोगिताबाटै बाहिरिसकेको छ।
अछामको अन्तिम खेल शुक्रबार बझाङसंग हुनेछ। दुई खेलमा दुवै जितेको बैतडी अंक तालिकाको दोस्रो स्थानमा छ।
एकमा हार र एकमा जित निकालेको कैलाली तेस्रो र दुवै खेल हारेको बझाङ पुछारबाट दोस्रो स्थानमा छ।
यो समाचार न्युज अफ नेपालबाट लिईएको हो ।
