काठमाडौं ।
नेपाल ‘ए’ र क्यानडा-११ बीचको सिरिजको तेस्रो तथा निर्णायक खेल आज हुँदै छ। मुलपानी क्रिकेट मैदानमा हुने यो खेल नेपाली समय अनुसार विहान ९:३० बजेदेखि सुरु हुने छ।
पहिलो खेल क्यानडा- ११ ले जितेको थियो भने दोस्रो खेलमा नेपाल ‘ए’ ले जित हासिल गरेको थियो। तीन खेलको सिरिज १-१ को बराबरीमा रहेको छ। आजको खेलमा दुवै टोली सिरिज कब्जा गर्ने योजनासहित मैदानमा उत्रँदै छन्।
क्यानले क्यानडाविरुद्ध खेल्न विनोद भण्डारीको कप्तानीमा १६ सदस्यीय नेपाल ‘ए’ टिम बनाएको छ।
नेपाल ए टिममा विनोद भण्डारी (कप्तान), आशुतोष घिरैया, अर्जुन कुमाल, बशीर अहमद, विवेक यादव, हेमन्त धामी, किरण ठगुन्ना, मायन यादव, प्रतिस जिसी, रसिद खान, रिजन ढकाल, सागर ढकाल, शाहब आलम, सन्दीप जोरा, शेर मल्ल र सुजन थपलिया रहेका छन् । नेपाल ‘ए’ टिमको प्रशिक्षकमा ज्ञानेन्द्र मल्ल र कलाम अली रहेका छन्।
नेपाल क्रिकेट संघ (क्यान) ले आफ्नो क्रिकेट इतिहासमा पहिलो पटक ‘ए’ टिम बनाएर खेल सुरु गरेको पहिलो पटक हो। क्यानडाले पनि आफ्नो आगामी लिग-२ को तयारी स्वरूप नेपाल ‘ए’ सँग खेलिरहेको छ।
क्यानडाले यही फेब्रुअरी २८ देखि युएईमा स्कटल्याण्ड र युएई सम्मिलित त्रिकोणीय सिरिजबाट आफ्नो लिग-२ को यात्रा सुरु गर्दै छ। आजको खेलपछि क्यानडा युएई जाने छ।
यो समाचार न्युज अफ नेपालबाट लिईएको हो ।
