म्याग्दी ।
विश्व मिर्गौला दिवस–२०२४ को अवसर पारेर आज (बिहीबार) मिर्गौला स्वास्थ्यसम्बन्धी सचेतना तथा परीक्षण कार्यक्रम सम्पन्न भएको छ । मिर्गौलालाई स्वस्थ र सुरक्षित राख्ने उद्देश्यसहित मिर्गौलाको बारेमा सचेतना र परीक्षण गरी दिवस मनाइएको हो ।
‘सामाजिक न्याय र पेसागत मर्यादाको लागि स्वास्थ्यकर्मीहरुको एकता, आम नागरिकहरुका लागि गुणस्तरीय स्वास्थ्य सेवा हाम्रो प्रतिबद्धता’ भन्ने नारासहित राष्ट्रिय स्वास्थ्यकर्मी महासङ्घ नेपाल जिल्ला कार्यसमिति म्याग्दीको आयोजना, म्याग्दी बहमुखी क्याम्पसको समन्वय र मिलन म्याग्दीको सहकार्यमा विश्व मिर्गौला दिवसको अवसर पारेर क्याम्पसमा कार्यक्रम सञ्चालन गरिएको थियो ।
मिर्गौला परीक्षण कार्यक्रमको विश्वास ल्याब, म्याग्दीको आर्थिक तथा प्राविधिक र दीगो क्लिनीक पर्वत बेनीले प्राविधिक सहयोग उपलब्ध गराएका थिए । म्याग्दी बहुमुखी क्याम्पसका विद्यार्थीहरुलाई लक्षित गरेर आयोजित कार्यक्रममा क्याम्पसका विद्यार्थी, प्राध्यापक तथा कर्मचारी र सहभागीसहित कुल २ सय २१ जनाले मिर्गौलाको स्वास्थ्य परीक्षण गरेका छन् । उक्त कार्यक्रममा प्रेसर तथा सुगर परीक्षण, तौल र उचाइको नापजाँच एवं पिसाबको परीक्षण गरी मिर्गौला सचेतनाको विषयमा जानकारी समेत गराइएको थियो ।
कार्यक्रममा बेनी अस्पताल म्याग्दीका जनरल फिजिसियन डाक्टर नितेश श्रेष्ठले मिर्गौलालाई स्वस्थ राख्ने सम्बन्धी विषयमा ध्यान दिनुपर्ने विभिन्न जानकारीसहित आफ्नो प्रस्तुतीकरण गर्नुभएको थियो । कार्यक्रमको उद्घाटन गर्दै म्याग्दी बहुमुखी क्याम्पसका क्याम्पस प्रमुख गोरखबहादुर जिसीले विश्व मिर्गौला दिवसमा आयोजित कार्यक्रमले मिर्गौला स्वस्थ राख्ने विषयमा जानकारी प्राप्त भएको बताउनुभयो । उहाँले आगामी दिनमा पनि यस्ता सचेतनामूलक कार्यक्रमहरु निरन्तर रुपमा सञ्चालन गर्नुपर्ने बताउँदै स्वास्थ्य र सचेतनाका कार्यक्रमहरुमा म्याग्दी क्याम्पसले पनि सहकार्य गरेर अगाडि बढ्ने बताउनुभयो ।
राष्ट्रिय स्वास्थ्यकर्मी महासङ्घ नेपाल म्याग्दीका अध्यक्ष सुमित्रा थजालीको अध्यक्षता र मिलन म्याग्दीका अध्यक्ष दिलमाया बिटालुले स्वागत गर्नुभएको कार्यक्रमको उपाध्यक्ष तिलकुमारी रानाले सञ्चालन गर्नुभएको थियो । यसअघि राष्ट्रिय स्वास्थ्यकर्मी महासंघले दरबाङमा नसर्ने रोगको स्क्रिनिङ शिविर, स्वास्थ्य सचेतना, सरसफाइलगायत विभिन्न कार्यक्रमहरु गरेका थियो । ‘मिर्गौला उपचारमा सबैको समान पहुँच र सुरक्षित चिकित्सकीय अभ्यास’ भन्ने नारासहित आज विश्व मिर्गौला दिवस नेपालमा पनि विभिन्न कार्यक्रमको आयोजना गरी मनाइएको छ ।
विश्वभर नै मिर्गौला रोगको प्रकोप बढिरहेको बेला रोगको पहिचान तथा उपचार र रोकथामका महत्त्वपूर्ण उपायहरूबारे सबैलाई सचेत गराउने उद्देश्यले यो दिवस मनाउने गरिन्छ । डाक्टरहरुका अनुसार अस्वस्थ जीवनशैलीले मिर्गौला रोग लाग्ने सम्भावना धेरै हुन्छ । ९० प्रतिशत मानिस मिर्गौला बिग्रिएपछि मात्र अस्पताल जाने गर्दछन् । मिर्गौला रोगबाट बच्न शरीरमा प्रशस्त मात्रामा पानीको व्यवस्थापन, उच्च रक्तचाप र मधुमेहलाई नियन्त्रण गर्न डाक्टरले सुझाव दिँदै आएका छन् ।
दिनमा दुईदेखि तीन लिटर पिसाब आउने गरी पानी पिउन, १० हजार पाइला हिँड्न, रातमा सात-आठ घण्टा मज्जाले सुत्न, चुरोट, खैनी, जाँडरक्सीले मिर्गौला बिगार्ने भएकाले यस्ता चीजबाट टाढा रहन तथा मोटोपन र उच्च रक्तचाप भए घटाउन डाक्टरहरुको सल्लाह छ । स्वस्थ खानपान तथा समयमा खाने र पेनकिलरलगायत जथाभावी औषधीको प्रयोग रोकेमा मिर्गौलामा लाग्ने रोगबाट बच्न सकिन्छ ।
यो समाचार न्युज अफ नेपालबाट लिईएको हो ।
