उदयपुर ।
उदयपुरको चौदण्डीगढी नगरपालिका ९ भीमामा कारको ठक्करबाट एक जनाको मृत्यु भएको छ । दुर्घटनामा चालक सहित तीन जना घाइते भएका छन् ।
मदन भण्डारी लोक मार्ग हुँदै गाईघाटबाट बेल्टारतर्फ जाँदै गरेको प्रदेश १ -०४- ००१ च १३८६ नम्बरको कारले ठक्कर दिँदा स्थानीय ४५ बर्षिय कमलादेवी चौधरीको मृत्यु भएको प्रहरीले जनाएको छ।
दुर्घटनामा मृतकसँगै रहेकी स्थानीय २७ बर्षिया पनावती चौधरी, चालक सप्तरीको फत्तेपुर निवासी अमर दियाली र कारमा सवार सावन खाती घाइते भएका छन्। घाइतेको अवस्था सामान्य रहेकाले नगर अस्पताल बेल्टारमा उपचार भइरहेको छ।
प्रहरीका अनुसार घुमाउरो सडकमा तीव्र गतिमा आएको कार अनियन्त्रित भई रुखमा ठोक्किएर कार उछिट्टिँदा सडक छेउको फलैचामा बसेका उनीहरूलाई कारले ठक्कर दिएको हो। घटनाको थप अनुसन्धान भइरहेको जिल्ला प्रहरी कार्यालय उदयपुरले जनाएको छ।
यो समाचार न्युज अफ नेपालबाट लिईएको हो ।
