धादिङ ।
यो:मरि पुन्हीको अबसरमा धादिङबेसीमा आयोजना गरिएको सडक नेवाः खाना उत्सावको स्टलमा यो:मरि माग अनुसार नहुँदा खोसाखोस भएको छ ।
सडकमै खाऔं, सडकमै रमाऔं, सडकमै कमाऔं भन्ने मूल नाराका साथ झिंगु नेवाः समाज धादिङले सडक नेवाः खाना उत्सवको आयोजना गरेको हो ।
नेवारी समूदायको मूख्य बसोबास क्षेत्र रहेको धादिङबेसीमा नेवारी संस्कृतिलाई प्रवद्र्धन गर्दै आर्थिक वृद्धिका लागि पहिलो पटक उत्सबको आयोजना गरिएको थियो ।
धादिङबेसी बिचबजारबाट त्रिबेणीचोकसम्मको सडकमा आयोजना भएको उत्सबमा नेवारी खानाको अत्याधिक माग भएकोले आयोजकले ग्राहकलाई खानेकुरा विक्रि गर्न भ्याइनभ्याइ भएको छ ।
यो:मरि नेवारी सस्कृति झल्काउने परिकार हो । चामलको पिठोभित्र खुदो वा खुवा हालेर बाफमा पकाइने परिकार हो । धेरै मानिस किन्न आएर पनि किन्न नपाएपछि यतिकै फर्किएका छन् ।
नेवारी समुदायको भाषा, सस्कृति, खाना परिकार तथा पोशाकलाई राष्ट्रिय तथा अन्तर्राष्ट्रिय रुपमा पहिचान स्थापित गर्न खाना उत्सवको आयोजना गरिएको झिंगु नेवाः समाज धादिङका अध्यक्ष राजकुमार श्रेष्ठले बताए ।
‘सडक नेवाः खाना उत्सव लोप हुदै गएको नेवारी संस्कृतिको जगेर्णा गर्ने विश्वास लिएका छौं । मानिसहरुको उत्साहजनक सहभागिताले हामीलाई थप हौसला थपेको छ’ उनले भने । सडक महोत्सवमा यो:मरि, चटामरी, बारा छोइला, सपुमिचा, मसरुम छोइला, सोयाविन छोइला, वः लगायतका नेवारी परिकारहरुको स्वाद लिएका थिए ।
खाने, रमाइलो गर्ने र नेवारी परिकारको स्वादसँगै नेवारी संस्कृतिको बारेमा जानकारी लिन आउनेहरुको भिड नै लागेको छ ।खासगरि यो:मरि खान आउनेहरुले लामो लाइन नै लागेर बसेको स्पष्ट देखिएको छ ।
धेरै मानिसहरुले यो:मरि किन्न नपाएर घर फर्किनु परेकोले आगामी दिनमा गरिने महोत्सवमा भने ग्राहकहरुले भरपुर किनेर खान मिल्ने व्यवस्था गरिने आयोजक गोबिन्दकुमार श्रेष्ठले बताए ।
यो समाचार न्युज अफ नेपालबाट लिईएको हो ।
