२० कात्तिक , रोल्पा – उपप्रधान तथा बिना विभागीय मन्त्री कृष्णबहादुर महराले देशको समृद्धिका लागि प्राविधिक शिक्षा जरुरी रहेको बताउनुभएको छ ।
उपप्रधानमन्त्री महराले रोल्पाको लिवाङमा निर्मित रोल्पा पोलिटेक्निकल इन्स्टिच्यूटको आज उद्घाटन गर्दै देश विकास अभियानमा प्राविधिक जनशक्तिको खाँचो रहने बताउनुभयो ।
उपप्रधानमन्त्री महराले भन्नुभयो, “रोल्पामा सञ्चालनमा रहेको प्राविधिक शिक्षालयमा देशकै उत्कृष्ट र नमूना बनाउनुपर्छ ।” आफू निर्वाचनको क्रममा दाङ पुगे पनि रोल्पा नछोडेको बताउनुभयो । रोल्पा प्राविधिक शिक्षालय आफ्नो परिकल्पना भएकाले यसको विकासका लागि निरन्तररुपमा लागिरहने उहाँले बताउनुभयो ।
पोलिटेक्निकल इन्स्टिच्यूटमा अध्ययनरत विद्यार्थीलाई पढाउँदै महराले शिक्षालय उद्घाटन गर्नुभएको हो । नेपालको नक्सामा विकासको खाका तथा अन्तर्राष्ट्रिय सम्बन्धलाई नक्सांकन गर्दै महराले करिब १५ मिनेट विद्यार्थीलाई पढाउनुभएको थियो ।
उपप्रधानमन्त्री महरा आफैँले दान गरेको करिब ३५ रोपनी क्षेत्रफल जग्गामा प्राविधिक शिक्षा तथा व्यावसायिक तालीम परिषद्द्वारा सञ्चालित सो पोलिटेक्निकल इन्स्टिच्यूटमा हाल पशु विज्ञानतर्फ डिप्लोमा तहमा पठनपाठन शुरु भएको छ ।
शिक्षालयमा आगामी दिनमा वन विज्ञान, स्वास्थ्य, निर्माण तथा कृषि विषयको समेत पठनपाठन गरिने जनाइएको छ ।
रासस
