नेपाल समाचारपत्र
हेटौंडा
मकवानपुर प्रहरीले हेटौंडा–३ स्थित पँर्वपश्चिम लोकमार्गको लेबटमा प्रहरी देखेर भाग्दै गरेकाको साथबाट हातहतियार र गोलीगठ्ठा बरामद गरेको छ।
उनलाई प्रहरी चौकी लेबटले नियन्त्रणमा लिएको हो। प्रसनी बिगबहादुर तामाङको कमान्डमा खटिएको ४ जना प्रहरीले सवारीसाधन चेक गरिरहेको अवस्थामा प्रहरी चेकिङ टोलीलाई देखेर नेवारपानीबाट हेटांैडा बजारतर्फ आउँदै गरेको यात्रुबाहक म्याजिकबाट ओर्लिएर उनीहरू भागेका थिए।
उक्त सवारीसाधनबाट ४ जना करिब ५० मिटर पर ओर्लिएर भागेपछि प्रहरीले पिछा गरेको थियो। प्रहरीले जम्बो चौतारा बस्ने वर्ष ३७ का अनिल भनिने जोकर मोक्तानलाई उनले बोकेको झोलाबाट कटुवा पेस्तोल ३ थान, नलकटुवा पेस्तोलमा फिट हुने गोली ११ थान, ३०३ राइफलको गोली १ थान, सुतलीबम १ थान, नेपाल प्रहरीको चुस्ता १ थानलगायत सामग्रीसहित बिहीबार बिहान करिब पौने ६ बजे पक्राउ गरिएको प्रहरी उपरीक्षक विकासराज खनालले बताउनुभयो।
फरार अन्य व्यक्तिको पहिचान भएर खोजतलास भइरहेको प्रउ खनालले बताउनुभयो। पक्राउ परेका जोकरका सम्बन्धमा थप अनुसन्धान तथा छानबीन भइरहेको र उनलाई मुलुकी ऐनको हातहतियार तथा खरखजाना ऐन, २०१९ तथा विष्फोटक पदार्थ ऐन, २०१८ अनुसार जिल्ला अदालतबाट म्याद थप गरी अनुसन्धान गर्नेतर्फ कारबाही भइरहेको प्रहरीले जनाएको छ।
यो समाचार न्युज अफ नेपालबाट लिईएको हो ।
