काठमाडौं । युट्युभमा भ्युजको आधारमा गायक सरोज ओलीले करोड क्लबमा ह्याट्रिक गरेका छन् । उनले गाएका तीनओटा आधुनिक गीतहरु युट्युबमा १ करोडभन्दा बढी पटक हेरिएको हो । यसअघि गायक ओलीको ‘तिमीलाई देखेपछि आई लभ यु’ र ‘माछीले खाने खोलीको लेउ’ बोलका गीतहरु युट्युबमा १ करोडभन्दा धेरैपटक हेरिसकिएको थियो ।
हालै उनले गाएको ‘जता जता पिरतीको बाटो’ बोलको गीतले पनि युट्युबमा १ करोड भ्यु बटुलेको छ । यो सँगै गायक ओली नेपाली आधुनिक गीत अन्र्तगत युट्युबमा लगातार तीन ओटै गीतमा करोड भ्युज पाउने पहिलो गायक भएका छन् । यसअघि कुनै पनि आधुनिक गायकहरुका तीन ओटै गीतहरुले लगातार करोड भ्युज पाएका थिएनन् । नेपाली आधुनिक गीतको क्षेत्रमा करोड क्लबमा ह्याट्रिक गरेर सरोज ओलीले नयाँ रेकर्ड बनाएका छन् ।
सरोज ओलीले गाएका तीन ओटै गीतलाई चर्चित संगीतकार बसन्त सापकोटाले संगीत दिएका छन् । साथै तीन ओटै गीत दिनेश थपलियाले लेखेका हुन् । साथै संगीतकार र गीतकारको रुपमा बसन्त सापकोटा र दिनेश थपलियाले पनि आधुनिक गीतको करोड क्लबमा ह्याट्रिक गरेका छन् । गायक सरोज ओलीले आफ्नो तीनओटै गीतहरु करोड भ्युज पुगेको अवसरमा विहिवार पत्रकार भेटघाटको आयोजना गरेका थिए ।
कार्यक्रममा कार्टुन्ज क्रु का सदस्यहरुको उपस्थिती रहेको थियो । ओलीका करोड पुगेका तीन ओटा गीत मध्ये दुई ओटा गीतमा कार्टुन्ज क्रुलाई फिचरिङ गरिएको थियो । साथै संगीतकार सापकोटा र गीतकार थपलियाको सहकार्यमा गायक ओलीले फेरि नयाँ गीतको घोषणा गरेका छन् । ‘पानी कुवाको’ बोलको नयाँ गीतमा पनि कार्टुन्ज क्रुले नै अभिनय गर्ने पक्का भईसकेको छ ।
यो समाचार न्युज २४ नेपालबाट लिईएको हो ।
