वीरगन्ज, (नेस)
प्रहरीले वीरगन्जबाट एक किलो सुनसहित एक जनालाई पक्राउ गरेको छ । सर्लाही हरिपुर नगरपालिका ९ बस्ने सन्तोषकुमार साहलाई प्रहरीले पक्राउ गरेको हो ।
एक किलो अवैध सुन बोकेर भारततर्फ जाँदै गरेको अवस्थामा वीरगन्ज महानगरपालिका शंकाराचार्य गेट अगाडिबाट साहलाई पक्राउ गरिएको प्रहरी उपरीक्षक रेवती ढकालले पत्रकार सम्मेलन गरी जानकारी दिए ।
‘एक किलो अबैध सुनसहित एक जनालाई पक्राउ गरेका छौं,’ उनले भने, ‘उनी बारे थप अनुसन्धान भइरहेको छ ।’पूर्व सूचनाका आधारमा इनर्वा प्रहरी चौकीका इन्चार्ज त्रिभुवन साह नेतृत्वको टोलीले सुन बरामद गरेको प्रहरीले जनाएको छ ।
खान तलासी गर्दा साह चढेको ना४८प ३७७४ नम्बरको मोटरसाइकलको सिटमुनी रहेको एयर फिल्टरमा लुकाइएको अवस्थामा सुन फेला परेको थियो ।६ टुक्रा सुनलाई कालो टेपले बेरेर त्यसपछि कागजमा राखेर फेरि सेतो टेपले बेरेर राखिएको अवस्थामा फेला परेको थियो ।
यो समाचार न्युज अफ नेपालबाट लिईएको हो ।
