मोतीराम तिमल्सिना, काभ्रे
८० जना विद्यार्थीहरुलाई नक्कली कलेज खोलेर ठगी गर्ने नेशनल हेल्थ फाउण्डेशन बनेपाका प्रशासन प्रमुख सुरज ज्ञवालीलाई जिल्ला अदालत काभ्रेपलाञ्चोकले पुर्पक्षका लागि थुनामा राख्ने आदेश दिएको छ ।
नुवाकोट टेक्निकल इन्ष्टिच्युटका नाममा सिमए र अनमीमा भर्ना गरिएका ८० विद्यार्थीहरु ठगी गरिएको थियो । ति मध्ये ६३ जनाले रकम फिर्ता पाएका छैनन भने उनिहरुको भविश्य समेत अन्योलमा परेको छ । ठगिएका मध्ये केहिले विभिन्न कलेजबाट अध्ययन गरी परीक्षा दिने अवसर प्राप्त गरेका छन् ।
६३ जनाको उजुरीका आधारमा प्रहरीले प्रशासन प्रमुख ज्ञवालीलाई पक्राउ गरेको थियो । सस्थाका संचालक तथा संस्थापक प्रिन्सिपल शिलाकान्त झा, संचालक अध्यक्ष कृष्ण बढुवाल, संचालकहरु मोहनराज भट्ट, भानुदेव जैसी,, शोभितजंग रायमाझी फरार छन् । अदालतले फरारहरुको हकमा म्याद जारी गरेको छ । जिल्ला न्यायाधीश दिपककुमार खरेलको बेञ्चले ज्ञवालीलाई पुर्पक्ष र अन्यलाई म्याद जारी गर्ने आदेश गरेको हो ।
कलेजका सञ्चालकहरुको स्थायी ठेगाना कैलाली हो । इलाका प्रहरी कार्यालय बनेपाले ९३ लाख ९० हजारको विगो सहित ठगी मुद्दा दर्ता गरेको थियो । २०७५ साल असार ६ गते प्रशासन प्रमुख ज्ञवालीले ठगिएका ६८ विद्यार्थी मध्ये ५ जनाको रकम फिर्ता गरेका थिए ।
अन्यले अझै रकम प्राप्त गरेका छैनन । ज्ञवाली र झा नातामा ज्वाई जेठान हुन् । यस अघि पनि कलेज बाटै विद्यार्थी ठगि गरेको अभियोगमा उनिहरुलाई कारवाही भए पनि शक्तिका आडमा थुनामा गएका थिएनन् ।
८ महिना अघि उजुरी परे पनि जिल्ला प्रशासन कार्यालय मौन रहँदा प्रिन्सिपल र संचालक फरार हुँदै आएका थिए । सिटिईभिटीले छानविन गरी कलेज खारेज गर्ने निर्णय गर्दा समेत प्रशासन मौन थियो । प्रमुख जिल्ला अधिकारी कृष्णबहादुर राउत आए लगत्तै यस्ता मुद्दाहरुमा प्रशासन सक्रिय भएको हो ।
विद्यालयका मुख्य संचालक शिलाकान्त झा अझै फरार छन् । जिल्ला प्रशासन कार्यालय काभ्रेपलाञ्चोकमा ठगीको उजुरी परेको ८ महिना पछि प्रशासनको सक्रियतामा ईलाका प्रहरी कार्यालय बनेपाका प्रहरी निरिक्षक सुनिल जंग शाहले उनलाई पक्राउ गरेका थिए । झा र ज्ञवालीले बार्षिक १ लाख २० हजारका दरले ९६ लाख रुपैया संकलन गरेर नक्कली कलेज संचालन गरी परिक्षा समेत दिने तयारी गरेका थिए ।
समाचार प्रकाशनपछि सिटिईभिटीले छानविन टोली गठन गरेको थियो । ‘अध्ययनका लागि दिएको डेड लाख रकम त खाए खाए, हाम्रो वर्ष दिनको समय र भविश्य समेत अन्धकार बनाए’– एक विद्यार्थीले भने–‘बनेपामा रहेको नेशनल हेल्थ फाउण्डेशनको नाममा विद्यार्थी भर्ना गराएर संचालक सदस्य सचिव शिलाकान्त झा र प्रशासन प्रमुख सुरज ज्ञवालीले दर्ता नै नभएको नुवाकोट टेक्निकल इन्ष्टिच्युटको नाममा झुक्याएर फाराम भरेका रहेछन् ।’
सिटिईभिटीमा दर्ता नभएको नुवाकोट टेक्निकल इन्ष्टिच्युटकै नाममा ज्ञवालीले विद्यार्थीको नक्कली हस्ताक्षर गराएका थिए । सिटिईभिटीका कर्मचारीको मिलेमत्तोमा नुवाकोट टेक्निकल इन्ष्टिच्युटको प्रवेश पत्र वितरण गरेका थिए । चालु शैक्षिक सत्रमा विद्यार्थी भर्ना लिन नपाउने गरी सिटिईभिटीले नेशनल हेल्थ फाउण्डेशन खारेजी गरेको सुचना प्रकाशन गरिसकेको छ ।
नेशनल हेल्थ फाउण्डेशनका नाममा विद्यार्थीलाई ठगि गरिएको छ भने सोहि कलेजका संचालक शिलाकान्त झाले फर्जि हस्ताक्षर गरेर जिल्ला प्रशासनमा संस्था नविकरण गराएका छन् ।
यो समाचार न्युज अफ नेपालबाट लिईएको हो ।
