मुम्बई । पछिल्लो समय बलिउड अभिनेत्री दिशा पटानीको डिमान्ड निकै बढिरहेको छ । उनी हेर्दाहेर्दै बलिउडकी ‘मोस्ट डिमान्डिङ’ अभिनेत्री बनेकी छन् । उनीकहाँ ठूल–ठूला निर्माता निर्देशक अफर बोकेर धाइरहेका छन् ।
उनले बलिउड अभिनेता अक्षय कुमारको जोडी बन्ने प्रस्तावलाई समेत नकारेकी छन् । ‘हाउसफुल–४’ का लागि दिशालाई यो अफर गरिएको थियो । समय मिलाउन गाह्रो भएको भन्दै उनले उक्त अफरलाई अस्वीकार गरेकी छन् ।
अहिलेसम्म दिशाले बलिउडमा दुई वटा मात्रै चलचित्रमा काम गरेकी छन् । उनले काम गरेका ती दुवै चलचित्र निकै हिट भएका छन् । उनले क्रिकेटर महेन्द्र सिंह धोनीको बायोपिकमा धोनीकी पत्नी साक्षीको भूमिका निभाएकी थिइन् ।
उनी यही चलचित्रबाट सबैको नजरमा पर्न सफल भइन् । हालै उनको दोस्रो फिल्म ‘बागी–२’ प्रदर्शनमा आयो र निकै राम्रो कमाई गर्न सफल भयो । यस चलचित्रमा उनी अभिनेता टाइगर श्राफको जोडीको रूपमा देखिएकी थिइन्।
यी दुवै रियल लाइफमै प्रेमीप्रेमिका समेत हुन् । ‘बागी–२’ को सफलतापछि बलिउडमा दिशाको चर्चा निकै चुलिएको हो ।अहिले सलमान खानको चलचित्र ‘भारत’ मा निकै व्यस्त दिशाले निकै मिहिनेत गरिरहेकी छन् । साथै उनले अभिनेता ऋतिक रोशनको जोडी भएर अर्को चलचित्रमा काम गर्ने निश्चित भएको छ।
लगालग चलचित्रमा अफर आएपछि उनले अक्षय कुमारको मुख्य भूमिका रहने ‘हाउसफुल–४’ का लागि समय व्यवस्थापन गर्न नसक्ने भन्दै अफर अस्वीकार गरेको भारतीय सञ्चारमाध्यमले उललेख गरेका छन् ।
कुनै वेला बलिउडमा चलचित्रमा काम गर्नका लागि निर्माता निर्देशकको दैलो चहार्ने दिशाको करिअरले यति चाँडो यत्रो उचाइ लेला भन्ने सायदै कसैलाई लागेको थियो । त्यस्तै उनी बलिउडमा ग्ल्यामरस र सेक्सी छबिका लागिसमेत उत्तिकै चर्चित छिन् ।
यो समाचार न्युज अफ नेपालबाट लिईएको हो ।
