टंक सुनार
रुपन्देही ,भदौ ९ । रुपन्देहीको देवदहमा भएको छुट्टा छुट्टै दुर्घटनामा चार जनाको मृत्यु भएको छ भने एक जना घाइते भएका छन । बिहिबार देवदहको भलुहीमा सडक दुर्घटना हुदा दुई जनाको घटना स्थलमै मृत्यु भएको हो । दुई जनाको उपचारका क्रममा देवदह मेडिकल कलेज भलुहीमा मृत्यु भएको प्रहरीले जानकारी दिएको छ । विपरीत दिसाबाट गुडिरहेका लु ३३ प ७०८३ र लु २३ प १०२८ नम्बरको मोटरसाइकल एक आपसमा ठक्कर खाँदा उक्त दुर्घटना भएको हो ।
मृत्यु हुनेमा रुपन्देहीको सैनामैना नगरपालिका पर्रोहाका खेमराज थापा ,नवलपरासीको सुनवल नगरपालिका खुनहवाका दिवाकर यादव र सुमन कुँवर रहेको प्रहरीले जनाएको छ । एक जनाको भने सनाखन हुन सकेको छैन । ठोक्किएका मोटरसाइकल क्षतविक्षत भएकाले तीब्र गतिका कारण दुर्घटना भएको हुनसक्ने प्रहरीको अनुमान रहेको छ । त्यसै गरी बिहिबार नै देवदहको शित्तल नगरमा पैदल यात्रुलाई मोटरसाइकलले ठक्कर दिदा एक जना पैदल यात्रु घाइते भएका छन । घाइते हुनेमा पाल्पा तानसेनका १६ बर्षिय छत्र राना रहेको प्रहरीले जानकारी दिएको छ । उनको अवस्था अहिले सामान्य रहेको छ ।
