काठमाडौं ।
नेकपा एमालेले गृहमन्त्री नारायणकाजी श्रेष्ठको राजीनामा मागेको छ। सोमबार बिहान सिंहदरबारमा बसेको संसदको राज्य व्यवस्था तथा सुशासन समितिको बैठकमा एमालेका नेता राजेन्द्र राईले बालकुमारी घटनाको जिम्मेवारी लिँदै गृहमन्त्रीले पदबाट राजीनामा दिनुपर्ने बताए। उनले सरकार र प्रहरीको कार्यशैलीप्रति प्रश्न गरे ।
शुक्रबार ललितपुरको बालकुमारीमा २ जनाको ज्यान जाने गरी भएको घटनामा समितिले गृहमन्त्री श्रेष्ठलाई जवाफको लागि बैठकमा बोलाएको थियो।
‘गृहमन्त्रीज्यु तपाईं शालीन ब्यक्ति, तपाईं राजिनामा दिनुस्। युवाहरू विदेश गएर काम गर्न चाहन्छु भन्दा तपाईं ताकी ताकी गोली हान्नु हुन्छ भने तपाईंले राजीनामा नदिए कस्ले दिन्छ?’ राईले बैठकमा भने, ‘चारैतिर असन्तुष्टि छ। अनि कसरी सुशासन हुन्छ? मान्छे मार्न पाइन्छ? तपाईं नै गृहमन्त्री रहिरने हो भने अब के होला? युवाहरूलाई सम्झाउन पर्थ्यो। किन मारेको?’
सांसद राईले मन्त्रीका पीएसओ र फिल्ड कमान्डर, डीएसपीलाई कारबाही गरेर नहुने भन्दै आईजी वा गृहमन्त्रीलाई कारबाही हुनुपर्ने बताए।
“सचिव, आईजीपीलाई कारबाही गर्नुस् न, तलको एउटा पीएसओलाई मात्र कारबाही गर्ने ? सीडीओलाई मात्र कारबाही ? तपाईं राजीनामा दिनुस्,” उनले भने, “हामी मान्दैनौँ, राजीनामा दिनुस् ।”गएको शुक्रबार ललितपुरको बालकुमारीमा तनावपछि प्रहरीले गोली चलाएको थियो । घटनामा दुई युवकको मृत्यु भएको थियो।
यो समाचार न्युज अफ नेपालबाट लिईएको हो ।
