काभ्रे।
धनेश्वर मन्दिर नजिकै रहेको सुरक्षण मुद्रण प्रेस बनिरहेको भवनसँगै सशस्त्र प्रहरी बल नेपाल नम्बर १५ गण हेडक्वाटर काभ्रेको मनसुनजन्य विपद् उद्धार अस्थायी वेश बसेको छ ।
२०८१ असार २ गते देखि पनौती नगरपालिका वडा नम्बर ५ स्थित साबिकको आइटी पार्क हालको सुरक्षण मुद्रण प्रेस रहेको भवनमा सशस्त्रको टोली बसेको हो । टोलीले बनेपा आसपास तथा काभ्रेपलाञ्चोक जिल्लाका विभिन्न स्थानमा हुने मनसुन विपदमा उद्धार गर्नेछ । सशस्त्र प्रहरी निरीक्षक विदुर कार्कीको नेतृत्वमा २५ जना सशस्त्र प्रहरीहरुको उद्धारका लागि आवश्यक पर्ने दक्ष जनशक्ति सहितको टिम तयारी अवस्थामा रहेको छ । सशस्त्र प्रहरीले जनशक्ति सहित आवश्यक पर्ने उद्धारका सामाग्रीहरु पनि तयारी अवस्थामा राखेको छ । गृह मन्त्रालयको निर्णय अनुसार पाँचखालमा रहेको हेडक्वाटरबाट रेखदेख र सञ्चालन हुने गरी अस्थायी क्याम्प उक्त स्थानमा बस्न सुरु गरेको हो ।
पाँचखालमा रहेको हेडक्वाटरबाट उद्धारका लागि खटिनु पर्दा सडक र दुरीका हिसावले समेत कठिनाई भएकाले सुरक्षण मुद्रण प्रेसमा अस्थायी क्याम्पका रुपमा बस्नु परेको सशस्त्र प्रहरीले बताएको छ । प्रहरीले मनसुनजन्य विपद्का लागि टोल फ्रि नम्बर १११४ उपलब्ध गराएको छ भने ०११–४९९३२० मा फोन गर्न सक्ने व्यवस्था मिलाएको छ । नेपाल प्रहरीको १०० नम्बर तथा आवश्यक स्थानमा फोन गरेर संकटमा उद्धारका लागि खबर गर्न सकिने बताइएको छ ।
यो समाचार न्युज अफ नेपालबाट लिईएको हो ।
