ललितपुर।
ललितपुर महानगरपालिका–१८ का वडाध्यक्ष दामोदर खड्काले अभिभावकले जति रकम विद्यालयमा बचत गर्छन् त्यति नै रुपियाँ वडा कार्यालयले पनि थपेर विद्यार्थीका नाममा बचत गरिदिने बताएका छन् ।
६०औं राष्ट्रिय बालदिवसका अवसमा शनिबार बालकुमारी निम्नमाध्यमिक विद्यालय सैंबुमा भएको राष्ट्रिय बालदिवस तथा सामाजिक लेखा परीक्षण कार्यक्रममा उनले सो बताएका हुन् ।
‘बचत गर्ने बानिको विकास गर्न यो कार्यक्रम ल्याएका हौं । यसले विद्यार्थीको वृत्तिविकासमा टेवा पुग्नेछ ।’ –विद्यालय व्यवस्थापन समितिका अध्यक्षसमेत रहेका खड्काले भने । विद्यार्थीलाई नैतिकशिक्षा दिन यसै शैक्षिक सत्रबाट संस्कृत पनि पढाउन थालिएको उनको कथन छ ।
विभिन्न जातजातिका छात्राहरूको स्वस्तिवाचनबाट सुरुआत गरिएको कार्यक्रममा अन्तरविद्यालय नृत्य प्रतियोगिता पनि गरिएको थियो । ‘यो देश मेरो पनि होइन र’ शीर्षकको गीतमा नृत्य गर्ने छात्राहरू उत्कृष्ट भएका थिए ।
उत्कृष्ट नृत्य गर्ने ८ जना विद्यार्थीलाई जनही नगद पुरस्कारसहित शैक्षिक सामग्रीबाट पुरस्कृत गरिएको विद्यालयका प्रधानाध्यापक सुरेन्द्रराज पौडेलले बताए ।
यो समाचार न्युज अफ नेपालबाट लिईएको हो ।
