काठमाडौं ।
निर्वाचन आयोगले स्थानीय तहको उपनिर्वाचनलाई लक्षित गरी लागू निर्वाचन आचारसंहिता अनुगमन गर्न टोली खटाएको छ ।
आचारसंहिता पालना भए नभएको सम्बन्धमा अनुगमन गर्न टोली गठन गरी परिचालन गरिएको आयोगले जनाएको छ।
आयोगका प्रवक्ता नीता पोखरेलका अनुसार आयोगले काठमाडौं महानगरपालिका–१६ र कीर्तिपुर नगरपालिकामा टोली खटाएको हो । वडा नं.१६ मा सहसचिव नारायणप्रसाद सापकोटा, सशस्त्र प्रहरी वरिष्ठ उपरीक्षक दिगविजय सुवेदी, उपसचिव (कानुन) सीता पुन श्रीष र प्रहरी उपरीक्षक सञ्जयसिंह थापालाई खटाइएको थियो।
अनुगमन गरी आचारसंहिता उल्लंघन गरेको पाइएमा निर्वाचन (कसुर तथा सजाय) ऐन, २०७३ बमोजिम कारबाही गर्न अधिकारसहितको टोलीलाई खटाइएको आयोगले जनाएको छ । त्यसै गरी कीर्तिपुर नगरपालिकामा प्रहरी वरिष्ठ उपरीक्षक दीपक रेग्मी, उपसचिव डा. थानेश्वर भुसाल, उपन्यायाधिवक्ता केदारकुमार अधिकारी र सशस्त्र प्रहरी उपरीक्षक अशोक न्यौपानेलाई खटाइएको छ।
आयोगका अनुसार उपनिर्वाचन हुने प्रत्येक स्थानीय तहमा निर्वाचन प्रचारप्रसारको सूक्ष्म अनुगमन भइरहेको छ। आचारसंहिताको उल्लंघन गरेको कारणबाट निर्वाचन स्वतन्त्र, स्वच्छ र धाँधलीरहित तवरबाट हुन नसक्ने कुरामा आयोग विश्वस्त भएमा आचारसंहिता उल्लंघन गर्ने उम्मेदवारको उम्मेदवारी निर्वाचन आयोग ऐन, २०७३ को दफा २३ बमोजिम रद्द गर्न सक्ने व्यहोरासमेत सम्बन्धित सबैमा जानकारी गराइएको छ।
यो समाचार न्युज अफ नेपालबाट लिईएको हो ।
