खोटाङ।
खोटाङस्थित दिक्तेल रूपाकोट मझुवागढी नगरपालिका–१४ बुइपामा किराँती प्रथम राजा यलम्बरकोे मूर्ति निर्माण कार्य सम्पन्न भएको छ । बुइपाको पञ्चदोबाटोमा रहेको तीस रोपनी बढी सरकारी जग्गामा निर्माणाधीन एलम्बर पार्कमा एक सय २० फिट अग्लो मूर्ति निर्माण भएको हो ।
किरात ऐतिहासिक तथा पर्यटकीय स्थल पञ्चरदोबाटोमा बिश्वकै अग्लो दाबी गरिएको यलम्बरको प्रतिमा राख्नेगरी निर्माण भइरहेको यलम्बर पार्कको काम पनि अन्तिममा पुगेको छ । माझ किरात खोटाङमा कोशी प्रदेश सरकारको ७० र नगरपालिकाको ३० प्रतिशत लगानी रहेको यलम्बर पार्क करिब १४ करोड रुपैंयाँ लागतमा पूरा हुने विस्तृत परियोजना प्रतिवेदन (डिपिआर)मा उल्लेख छ ।
उमा–तुवाचुङ–अनसुवी जेभीले निर्माणको जिम्मा लिएको यलम्बर पार्कको काम ९५ प्रतिशत पूरा भएको ठेकेदार कम्पनीका प्रतिनिधि एवम् तुवाचुङ कन्ट्रक्शन प्रा.लि.का प्रबन्ध-निर्देशक सुनिल राईले बताए । आगामी वैशाख पहिलो हप्तासम्ममा निर्माणाधीन पार्कको सबै काम सम्पन्न हुने राईको भनाई छ । शालिक सहितको उक्त पार्क २०८२ वैशाख–१० गते नगरपालिकालाई हस्तान्तरण गर्ने तयारी रहेको जनाईएको छ ।
पञ्चरदोबाटा बजारमा हरेक हप्ताको शुक्रबार हाट समेत लाग्ने गरेको छ ।
सगरमाथा लोकमार्गमा पर्ने आकर्षक यलम्बर पार्क तथा यलम्बरको शालिकका कारण आन्तरिक तथा बाह्य पर्यटकलाई आकर्षित हुने स्थानीयको अपेक्षा छ ।
किरात समुदायको ईतिहासलाई संरक्षण गर्दै पर्यटन प्रवद्र्धनमा सघाउ पु¥याउने उद्देश्यले यलम्बरको पूर्ण कदको शालिकसहितको यलम्बरपार्क निर्माण गरिएको दिक्तेल रुपाकोट मझुवागढी नगरपालिकाका उपप्रमुख विशन राईले बताएका छन् । यलम्बरपार्क निर्माण गर्ने आयोजनालाई प्रदेश सरकार र नगरपालिकाले प्रमुख प्राथमिकतामा राखेको थियो । उक्त पार्कले नगरपालिकाको मात्र नभइ प्रदेशकै पर्यटन प्रवद्र्धनमा सघाउ पुग्ने विश्वास लिएको उपप्रमुख राईले सुनाए ।
यो समाचार न्युज अफ नेपालबाट लिईएको हो ।
