काठमाडौँ।
बालबालिकाहरुलाई बुद्धका ज्ञानमा आधारित नैतिक र व्यावहारिकसंगै जीवन जीउने सीप सिकाउन राजधानीको बुद्धनगरस्थित अन्तर्राष्ट्रिय बौद्ध भावना केन्द्रमा बाल शिविर सञ्चालन भएको छ ।
विद्यार्थीहरु परीक्षा सकिएपछिको बिदालाई सदुपयोग हुने गरी केन्द्रले शुक्रबारदेखि दोस्रो चरणको बाल शिविर सञ्चालन गरेको हो । जाने र फर्किने दिन गरी सातदिनसम्म चल्ने सो शिविरमा गौतम बुद्धले मानव जीवनकल्याणका लागि दिएका ३८ प्रकारका उन्नति हुने शिक्षा मंगल सुत्रमा आधारित नैतिक, व्यावहारिक र सामाजिक ज्ञान दिइने छ । त्यस्तै कर्म र त्यसको परिणाम, बालमनोविज्ञान सशक्त गर्ने विषय पनि सिकाइने छ ।
त्यसैरी चित्तको एकाग्रता, मनोबल विकास र समस्यासंग जुध्ने क्षमता बढाउन श्वासलाई हेर्ने ध्यान विधिको अभ्यास र मैत्री भावना बढाउने व्यावहारिक अभ्यास गराइने केन्द्रका अध्यक्ष प्रत्येकरत्न ताम्रकारले जानकारी दिए । बालबालिकाहरुमा असल संस्कारको विकास र मोबाईलको लतबाट छुटकारा दिलाउने उद्देश्यले आफ्ना सन्तानहरुलाई शिविर पठाउने गरेको पनि अध्यक्ष ताम्रकारले जानकारी दिए। अहिले सो शिविर एक सय जना बालबालिकाहरु सहभागी भएका छन् । बालकहरु आफ्नो इच्छा अनुसार अस्थायी भिक्षु भएर र साधारण रुपमा सहभागी भएका थिए।
शिविर अवधिभर बालबालिकाहरुले केन्दमै खाने र बस्ने छन् । शान्त र अनुशासित वातावरणकाबीच बालबालिकाहरुलाई असल संस्कारको बिजारोपण गर्ने उद्देश्यले केन्द्रमा साढे तीन दशकदेखि बालशिविर सञ्चालन हुुँदै आएको अध्यक्ष ताम्रकारले बताए । हालसम्म शिविरबाट दसौ हजार बालबालिकाहरु लाभान्वित भइसकेको केन्द्रले जनाएको छ ।
यो समाचार न्युज अफ नेपालबाट लिईएको हो ।
