काठमाडौँ।
युरोपको सबैभन्दा प्रतिष्ठित क्लब फुटबल प्रतियोगिता च्याम्पियन्स लिगको उपाधि पहिलो पटक जितेपछि फ्रान्सको राजधानी पेरिसमा उत्सवको माहोल तनावमा परिणत भएको छ। पेरिस सेन्ट-जर्मेन (PSG) का समर्थक र सुरक्षाकर्मीबीच झडप हुँदा करिब ३०० जनालाई प्रहरीले नियन्त्रणमा लिएको छ।
पीएसजी समर्थकहरू क्लबको ऐतिहासिक जितको खुशीमा पेरिसका विभिन्न स्थानमा भेला भएका थिए। क्लबको घरेलु मैदान पार्क डेस प्रिन्सेस र प्रसिद्ध च्याम्प्स-एलिसेस क्षेत्रमा करिब ५०,००० समर्थकले ठूला पर्दामार्फत खेलको लाइभ प्रसारण हेरेका थिए।
तर, खेल सकिएपछि उत्सव हिंसात्मक बन्दै गएको थियो। केही उत्साहित समर्थकहरूले पटाका पड्काउनुका साथै बस स्टपहरूमा तोडफोड गरे। केही स्थानमा सवारीसाधनमा समेत आगजनी गरिएको थियो। स्थिति नियन्त्रणमा लिन प्रहरीले अश्रुग्यास र पानीको फोहरा प्रयोग गर्नुपरेको थियो।
पेरिस प्रहरी प्रशासनले सम्भावित अराजकता रोक्न ५,४०० भन्दा बढी सुरक्षाकर्मी परिचालन गरेको थियो। झडपपछि प्रहरीले तोडफोड, सार्वजनिक स्थानमा अशान्ति मच्चाएको र अवैध रूपमा पटाका बोकिरहेको अभियोगमा ३०० जनालाई पक्राउ गरेको जनाएको छ।
फाइनल जितसँगै पीएसजीले आफ्नो इतिहासमै पहिलो पटक च्याम्पियन्स लिगको उपाधि जितेको हो। यस ऐतिहासिक सफलतापछि फ्रान्सका राष्ट्रपति इमानुएल म्याक्रोनले सामाजिक सञ्जालमार्फत क्लबलाई बधाई दिएका छन्। उनले लेखेका छन्, “बधाई छ, हामी तपाईंमाथि गर्व गर्छौं। आज पेरिस युरोपको राजधानी बनेको छ।” बीबीसी
यो समाचार न्युज अफ नेपालबाट लिईएको हो ।
