काठमाडौं ।
संघीय निर्वाचन २०८२ फागुन २१ गते मोरङ निर्वाचन क्षेत्र नं. ६ बाट नेपाली कांग्रेसका उम्मेदवार डा. शेखर कोइरालाले बिराटनगर महानगरपालिका वडा नं. ११ र १२ का मतदातासँग प्रत्यक्ष भेटघाट तथा छलफल गर्नुभएको छ। चुनावी अभियानअन्तर्गत आयोजित भेटघाट कार्यक्रममा डा. कोइरालाले स्थानीय मतदाताको गुनासो, समस्या र अपेक्षाबारे जानकारी लिनुभएको थियो।
भेटका क्रममा मतदाताले सडक, खानेपानी, रोजगारी, शिक्षा र स्वास्थ्य सेवाका विषयमा आफ्ना धारणा राखेका थिए। जवाफमा डा. कोइरालाले जनताको आवश्यकता र चाहनाअनुसार विकासका योजना अघि बढाइने बताउँदै जनमुखी नीति र सुशासन कांग्रेसको प्राथमिकता रहेको उल्लेख गर्नुभयो।
डा. कोइरालाले संविधानको रक्षा, लोकतन्त्रको सुदृढीकरण र आर्थिक समृद्धिका लागि कांग्रेसलाई बलियो जनमत आवश्यक रहेको भन्दै आगामी निर्वाचनमा समर्थन गर्न मतदातासँग आग्रह गर्नुभयो। स्थानीय मतदाताले पनि प्रत्यक्ष संवादबाट आफ्ना कुरा राख्न पाउँदा सकारात्मक प्रतिक्रिया दिएका थिए।
यो समाचार न्युज अफ नेपालबाट लिईएको हो ।
