०३ मंसिर ,गुल्मी – सवारी दुर्घटना बढ्दै गएपछि तीन बर्षअघि गुल्मीमा तत्कालिन प्रमुख जिल्ला अधिकारी प्रदिपराज कडेलले सवारी टाइम कार्ड लागु गरे । त्यो कार्य सवैका लागि प्रशंसनीय बन्यो पनि । कडाईका साथ जिल्लामा लागु पनि भयो । तर जब उनी सरुवा भए त्यो अभियान उनीसँगै सरुवा भयो । गुल्मी छिर्ने र बाहिर जाने सवै सार्वजनिक सवारी साधनमा टाइम कार्ड हुन्थ्यो । बेलाबेलामा कडेल आफैले छडके चेकजाँच पनि गर्थे । उनीपछि त्यो क्रम बिस्तारै सेलाउँदै गयो । कँडेलपछि केहि प्रमुख जिल्ला अधिकारी र प्रहरी प्रमुख फेरिए तर अभियानले निरन्तरता पाउन सकेन ।
पुन: दुर्घटना बढ्न थालेपछि फेरी टाइम कार्डले निरन्तरता पाउने भएको छ । गुल्मीबाट छुट्ने र भित्रने सवै सार्वजनिक गाडीलाई टाइम कार्ड लागु गरिएको छ । दुर्घटना कम गर्न भन्दै जिल्ला ट्राफिक प्रहरी कार्यालयको सक्रियतामा टाइम कार्डको व्यवस्था गरिएको हो । केहि कार्यालय प्रमुखहरुले शुरुमा धेरै रचनात्मक काम देखाउने भएकाले अभियानले निरन्तरता पाउनेमा नागरिक कम आशावादी रहेका छन् । ‘केहि हाकिम सापले शुरुमा मात्र चुरीफुरी देखाउँछन, प्रदिप सिडियो हुँदा धेरै राम्रा अभियान थिए,’विद्यार्थी नेता नविन अर्यालले भने,‘ उनी गएसंगै ध्वनी वडा पत्र, क्लोथ बैंक, टाइम कार्ड र सरसफाई अभियान हराएर गयो ।’ एउटा कार्यालय प्रमुखले गरेका जतिसुकै राम्रा काम भएपनि अर्को आएर त्यसलाई सकेसम्म कार्यान्वयन नगर्ने र अर्को काम देखाउन खोज्ने गलत नजिर रहेको उनले बताए ।
टाइम कार्डको जाँचमा कडाई गर्छौ : प्रजिअ
शनिबारबाट कडाईका साथ गुल्मीबाट पाल्पा, बुटवल, काठमाडौं लगायतका स्थानमा छुट्ने सवारी साधनहरुलार्ई टाइम कार्डको व्यवस्था गरिएको गुल्मीका प्रमुख जिल्ला अधिकारी गोपाल आर्यालले जानकारी दिए । गाडी चालकलाई टाइम कार्ड लागु भएको जानकारी गराउँदै प्रमुख जिल्ला अधिकारी अर्यालले दुर्घटना न्यूनिकरण गर्न टाइम कार्डमा उल्लेखित समयको पालना गरेर सवारी सञ्चालन गर्न निर्देशन दिए । टाइम कार्ड अनुसार चालकले सवारी साधन सुरु गरे बढ्दो दुर्घटना न्यूनिकरण गर्न मद्दत हुने उनको विश्वास छ । ‘टाइम कार्डको जाँच कडाईका साथ गरिने छ,’ अर्यालले भने,‘यात्रा गर्ने महानुभावले पनि सिट क्षमता, तिब्र गति, चालकले मापसे गरे नगरेको लगायका कुराहरुमा ध्यान दिनुपर्छ ।’ गुल्मीबाट छुट्ने बस, हाइस, निसान गाडी र जिपलाई टाइम कार्डको व्यवस्था गरिएको छ ।
कुन स्थानमा कति समयमा पुग्ने
सदरमुकाम तम्घासबाट जिल्ला बाहिर छुट्ने सार्वजनिक सवारी साधनलार्ई रिडीसम्मका लागि टाइम कार्डको व्यवस्था गरिएको हो । सदरमुकाम तम्घासबाट छुटने बसले रिडी दुई घण्टा ४५ मिनेटमा पु¥याउनु पर्ने छ । हाइस, निसान गाडीले दुई घण्टामा रिडी पुग्ने गरि टाइम कार्डको व्यवस्था गरिएको ट्राफिक कार्यालय गुल्मीका हवल्दार देबीप्रसाद पौडेलले जानकारी दिए । सबै गाडीले टाइम कार्ड अनुसार गाडी चलाए बढ्दो दुर्घटना कम गर्न मद्दत पुग्ने उनको भनाई छ ।
डोजर चलाउँदा दुईजना अनिवार्य
एक महिनाको अवधीमा मात्रै बाटो खन्ने क्रममा डोजरले पल्टाएको ढुंगाले लागेर मानिस दुई जनाको ज्यान गयो । मर्ने क्रम बढ्दै जान थालेपछि अहिले नयाँ नियम लागु गरिएको छ । पछिल्लो समय डोजर चालकले एक्लै बाटो बिस्तार गर्ने गरेपछि आवत जावत गर्ने मानिसलाई सास्ती भएको गुनासो आइरहेको थियो । बाटो बिस्तार भएको ठाउँमा सूचना प्रसारण गर्ने तथा अनिवार्य हेल्फर राख्ने व्यबस्था गरिएको प्रमुख जिल्ला अधिकारी अर्यालले जानकारी दिए । हेल्फरले पैदल यात्रुलाई आवतजावतमा सहजता गराउने बताए ।
दुर्घटना न्यूनिकरण गर्न सड्कमा ऐना
गुल्मीको प्रमुख सडकमा दुर्घटना न्यूनिकरण गर्न सडक छेउमा ऐना राखिएको छ । जिल्लाको सदरमुकाम तम्घासदेखि रिडीसम्म रहेका अति जोखिमपूर्ण घुम्टीहरुमा ऐना राख्ने काम थालिएको छ । सड्क डिभिजन कार्यालय पाल्पाको आर्थिक सहयोग र जिल्ला स्थित ट्राफिक प्रहरी कार्यालय, जिल्ला प्रशासन कार्यालय गुल्मी, जिल्ला प्रहरी कार्यालय लगायतको महत्वपूर्ण पहलमा उक्त ऐना राख्ने काम भएको छ । तम्घास देखि रिडी सम्म ४५ किलो मिटर सड्कमा पर्ने अति जोखिमपूर्ण घुम्टीहरुमा सड्क ऐना राखिने जिल्ला ट्राफिक कार्यालय गुल्मीका भरत गुरुङ्गले जानकारी दिए । पहिलो चरणमा सवारी आवत जावत गर्दा सवारी नै नदेखिने घुम्तिमा १४ वटा सड्क ऐनाहरु राखिएको सड्क डिभिजन कार्यालय कार्यालय पाल्पा सुचना अधिकृत पबित्रामणी आचार्यले जानकारी दिए ।
यो खबर आजको नयाँ पत्रिकामा छ ।
