रुपन्देही, भौतिक पूर्वाधार तथा यातायातमन्त्री रघुवीर महासेठले सिद्धार्थ राजमार्गको बुटवल–पाल्पा सडकखण्डको सिद्धबाबा पहिरोको आज स्थलगत निरीक्षण गर्नुभएको छ ।
स्थलगत अनुगमनपछि उहाँले सिद्धार्थ राजमार्गअन्तर्गत बुटवलको चिडिया खोलादेखि पाल्पाको दोभानसम्म सुरुङमार्ग निर्माण थालिने जानकारी दिनुभयो ।
मन्त्री महासेठले एक साताभित्र प्रतिवेदन बुझाउन निर्देशन दिँदै नयाँ आर्थिक वर्षबाट नै सुरुङमार्गको काम शुरु गरिने बताउनुभयो ।
पाल्पाका प्रतिनिधिसभाका सांसद सोमप्रसाद पाण्डेले तल्लो सिद्धबाबादेखि माथिल्लो सिद्धबाबासम्म झण्डै तीन किमी सडक क्षेत्र जोखिममा रहेको बताउनुभयो ।
यो सडकखण्डमा वर्षामा मात्रै होइन हिउँदमा समेत सुक्खा पहिरो खसेर अनेकौँले ज्यान गुमाएका छन् । अहिलेसम्म साना–ठूला गरेर तीन किमी क्षेत्रमा ११३ वटा पहिरो खसेको छ ।
पाल्पा जिल्ला विकास समन्वय समितिका सभापति दया बस्नेतले १० वर्षको अवधिमा पहिरोबाट ७० जनाको मृत्यु भएको जानकारी दिनुभयो ।
सडकखण्डमा ढुङ्गे पहिरो खस्दा र दुर्घटना भएर १० वर्षमा १८ बस, सात ट्रक, कार, जिप, नौ र मोटरसाइकल १९ दुर्घटनामा परेका छन् ।
रासस
यो समाचार न्युज अफ नेपालबाट लिईएको हो ।
