गौशाला ।
बाढीले महोत्तरी जिल्लाको गौशाला र औरही नगरपालिका सडकखण्डमा पर्ने जंघा नदीको पुलमुनिको माटो बगाउँदा आवागमन अवरुद्ध भएको छ ।
दुई नगरपालिकाको मेरुदण्डका रुपमा रहेको जंघा नदीमा आएको बाढीले पुलको पूर्वी किनाराको मुख्य पिलरमुनिबाटै माटो बगाएर लगेपछि गौशालादेखि औरही र औरहीदेखि गौशाला जाने ठूला सवारीसाधन र मालबाहक साधनलाई आवागमनमा रोक लगाइएको हो ।
गत आइतबारदेखि जिल्लामा निरन्तर परेको पानीले जंघा नदीमा ठूलो बाढी आएर पुलमुनिको माटो बगाउँदा गौशाला औरही बाटोमा चार चक्के सवारी र मालबाहक साधनलाई आवागमनमा रोक लगाइएको औरही नगरपालिकाका प्रमुख सुनिलकुमार यादवले बताउनुभयो ।
तर सो पुलबाट मोटरसाइकल, साइकल र पैदलयात्रु आवागमनमा कुनै पनि रोक नलगाइएको र सर्वसाधारण निर्वाधरुपमा आउजाउ गरिरहेको गौशाला नगरपालिकाका प्रमुख शिवनाथ महतोले बताउनुभयो ।
दुवै नगरपालिकाका प्रमुखले सो पुलको अवस्थाबारे आफूहरुको गम्भीर ध्यानाकर्षण भएको तर बाढीको बेला तत्कालै केही गर्न नसकिने हुँदा बाढी सकिने बित्तिकै पुलका ठेकेदार, नगरपालिका र सम्बन्धित निकायसँगको सहकार्यमा तुरुन्तै सो पुलको मर्मत गरी आवागमन पुनः सुचारु गराउने बताउनुभयो ।
सो पुलबाट आवागमनमा रोक लगाइएदेखि दर्जनौँ भारी सवारीसाधन र मालबाहक साधन गौशाला र औरही दुवैपट्टि बाटो खुल्ने प्रतिक्षामा बसिरहेका छन् ।
रासस
यो समाचार न्युज अफ नेपालबाट लिईएको हो ।
