१५ असोज , बुटवल – सिद्धार्थ राजमार्ग अन्तर्गत सिद्धबाबा नजिक खसेको पहिरोले बाटो पुर्ण रुपमा अबरुद्ध भएको छ । क्षेत्रीय ट्राफिक प्रहरी कार्यालय बुटवलका अनुसार राजमार्गको पाल्पा सिद्धबाबा मन्दिर नजिकै गए राति पहाड माथिबाट खसेको ढुङ्गा सहितको पहिराले गर्दा करिब साढे ११ बजेदेखि सडक आवागमन अवरुद्ध भएको जानकारी गराएको छ ।
बाटो अबरुद्ध भएपछि बुटवल – पाल्पा सडकखण्ड हुँदै चल्ने सयौं सवारीसाधन रोकिएका छन् भने दसैको लागि टीका लगाउन हिडेका हजारौं यात्रुहरु अलपत्र परेका छन् । पहिरोसंगै ठूलो ठूलो ढुङ्गा खसेकोले बाटो खुलाउन समय लाग्ने प्रहरीले जनाएको छ । बाटो खुलाउन बुटवल र पाल्पातर्फबाट ३ वटा डोजर प्रयोग भइरहेको छ । पहिरो ठूलो भएकोले आज बाटो खुलाउने सम्भावना न्यून रहेकोले बैकल्पिक बाटो प्रयोग गर्न समेत प्रहरीले अनुरोध गरेको छ।
