१३ कात्तिक , काठमाडौँ – निर्वाचन आयोगले प्रतिनिधि सभा र प्रदेशसभा निर्वाचनको प्रतक्ष्यतर्फको मतपत्र अलग अलग गर्ने निर्णय गरेको छ । सर्वोच्च अदालतको आदेशअनुरुपआयोगले आइतबार सो निर्णय गरेको हो । अदालतको आधिकारिक पत्र शनिबार आयोगमा आइपुगेको थियो ।
महान्यायाधिवक्ता कार्यालयसँग थप परामर्श गरेपछि आयोग छुट्टाछुट्टै मतपत्र छाप्ने निर्णयमा पुगेको हो । यसअघि अदालतको पत्र नआएको भन्दै दुवै निर्वाचनको मतपत्र एउटै पानामा छाप्ने तयारी आयोगले गरेको थियो ।
दुई मतपत्र छपाइसँगै मतपत्र बाकस, छाप लगाउने स्थान, मतदान अधिकृतको व्यवस्था के हुने भन्ने विषयमा भने आयोगले केही खुलाएको छैन ।
आयोगका प्रवक्ता नवराज ढकालले भने निर्वाचन तोकिएकै मितिमा हुने दाबी गरे । आयोगको कार्यतालिकाअनुसार कार्तिक १० बाट प्रतक्ष्यतर्फको मतपत्र छपाई शुरु गर्नुपर्ने थियो । तर अन्योलका कारण आयोगले मतपत्र छपाई शुरु गरेको थिएन ।
यो खबर आजको नेपाल समाचारपत्रमा छ ।
