११ दिनदेखि बेपत्ता डंगोल मारिएको तस्बिर उनकै फेसबुकमा

११ दिनदेखि बेपत्ता डंगोल मारिएको तस्बिर उनकै फेसबुकमा

तीन साताअघि रसुवाको मोर्डन ट्रिनिटी इंग्लिस बोर्डिङ स्कुलका सञ्चालक चित्रमान डंगोलको आफु स्याफ्रुमा होटेल व्यवसाय गर्छु भनेर बताउने राजन नगरकोटीसँग नुवाकोटको बट्टारमा भेट भयो । भेटमा नगरकोटीले आफूले रसुवाको स्याफ्रुमा होटेल व्यवसाय गरिरहेको र घर पनि बेचेकाले कुनै क्षेत्रमा लगानी गर्न चाहेका बताए ।

नगरकोटीले डंगोलले सञ्चालन गर्दै आएको विद्यालयमा सेयर लगानी गर्न इच्छा देखाए । आपसी समझदारीेपछि उनलाई नगरकोटीले १५ चैतमा स्याफ्रु आउन आग्रह गरेपछि डंगोल बिहानै घरबाट निस्किएको श्रीमती लक्ष्मी थोक्रा डंगोलले बताइन् ।

‘हामीबीच नराम्रो केही भएको थिएन, सल्लाहमै एक वर्षअघि टिमुरेका काले तामाङसँग लिइएको ६ लाखको ब्याज करिब डेढ लाख रुपैयाँ पुगेको थियो, त्यो रकम पनि दिएर आउँछु र राजनसँग सल्लाह गरेर आउँछु भन्नुभएको थियो । अनि म स्कुल गएँ, उहाँ घरबाट निस्किनुभयो,’ उनले भनिन् ।

जिल्लाको उत्तरगया गाउँपालिका–५ लहरेपौवाका डंगोल १५ चैत बिहानै ‘स्याफ्रुबेसी’ जान घरबाट निस्किएका थिए । ‘उहाँ बिहान सवा ८ बजे घरबाट निस्किनुभएको थियो । त्यसपछि म खाना खाएर स्कुल गएँ ।

विद्यालय छुट्टी भएपछि मैले फोन गर्दा फोन लागेन,’ श्रीमती लक्ष्मीले भनिन् । बेपत्ता भएपछि परिवारले उनको खोजी सुरु ग¥यो । साथीभाइ, आफन्त भएतिर सम्पर्क गर्दा फेला नपरेपछि १८ चैतमा परिवारले खोजीका लागि प्रहरीमा उजुरी दिएका थिए ।

सात घन्टा जिल्ला बन्द

११ दिनदेखि बेपत्ता विद्यालय सञ्चालक डंगोलको फेसबुकमा उनकै वीभत्स तस्बिर पोस्ट भएपछि आफन्तले सोमबार सात घन्टा जिल्ला बन्द गराएका छन् । डंगोलको फेसबुकमा आइतबार राति १०ः४५ मा ‘१२ वर्षअघि भाइलाई छुरा हानेको बदला लिन मारिएको’ स्टाटससहितको फोटो पोस्ट भएको थियो । त्यसको सत्यतथ्य पत्ता लगाउन माग गर्दै आफन्तले सोमबार बिहान ७ देखि दिउँसो २ बजेसम्म रसुवा बन्द गराए ।

बेपत्ता भएका उनको खोजीका लागि प्रहरीलाई उजुरी दिए पनि चासो नदिएको र वीभत्स ढंगले हत्या भएको तस्बिर सार्वजनिक हुँदा पनि अभियुक्त पक्राउ गर्न नसकेको भन्दै स्थानीय आक्रोशित भएका छन् । रसुवा बन्द खुलाउने विषयमा प्रशासनले पीडित पक्षसँग छलफल गर्दै घटनाबारे जतिसक्दो चाँडो यथार्थ पत्ता लगाउने प्रतिबद्धता जनाएको छ ।

फेसबुकमा सार्वजनिक तस्बिर झुटो : प्रहरी

डंगोलको फेसबुकमा वीभत्स हत्या गरिएको तस्बिर झुटो रहेको प्रहरीले जनाएको छ । अनुसन्धानको क्रममा ६ महिनाअघि अन्य सञ्जालमा प्रयोग गरिएको तस्बिर पोस्ट गरिएको भेटिएको प्रहरी नायब उपरीक्षक शरतकुमार थापाको भनाइ छ । बेपत्ता भएका डंगोलको खोजी कार्य तीव्र बनाइएको थापाले बताए ।

आइतबार राति १०ः४५ बजे डंगोलको फेसबुकमा लेखिएको थियो, ‘जसरी यसले मेरो भाइको १२ वर्षअघि पेटमा छुरी हानेको छ, भाग्यले मेरो भाइ बाँच्यो र आजसम्म ऊ अशक्त छ, यसलाई पनि मेरो भाइको जस्तै हाल बनाउने चाहना छ ।

तर, यो बाँच्यो भने मेरो बर्बाद पारिदिन्छ । यति राम्रो मौका पाइयो, कसैले पत्ता नलगाई सिद्धियो, यसैको फेसबुकमा लेख्ने पोस्ट गर्ने, यो पनि यसको मोबाइलबाट हा हा… सबैको पालो आउँछ भनेको यो हो । पैसा पनि रेछ…हा हा…।’