बाँके । नेकपाका वरिष्ठ नेता झलनाथ खनालले कम्युनिष्ट पार्टीभित्र गुटबन्दी बन्द गर्नुपर्ने बताएका छन् ।
कार्ल माक्र्स जन्म द्विशतवार्षिकी समारोहको ५ नम्बर प्रदेशस्तरीय दुई दिने गोष्ठीको शुक्रबार नेपालगञ्जमा उद्घाटन गर्दै वरिष्ठ नेता खनालले कम्युनिष्ट भित्र गुटबन्दी, आग्रह, पूर्वाग्रह राख्ने प्रवृत्ति देखिएकाले त्यसको अन्त्य हुनुपर्ने बताउनुभयो ।
‘पार्टी एकताबद्ध हुनुपर्छ । हरेक सदस्यले कुनै न कुनै जिम्मेवारी पाउनु पर्छ, खनालले भन्नुभयो, कम्युनिष्टलाई सामुहिक पार्टी भन्ने अनि एक्लै र गुटका आधारमा अघि बढ्ने हुनुहुँदैन ।’ उहाँले पार्टीलाई परिस्कृत र परिमार्जन गरेर अघि बढ्नका लागि आन्तरिक विधान बनाउने काम भइरहेको बताउनुभयो ।
खनालले नेपालको राष्ट्रियता अझै पनि खतरामा रहेको उल्लेख गर्नुभयो । ‘सीमा मिचिएको छ । कालापानीलाई अझै हाम्रै हो भनेर ठोकुवा गर्न सकेको छैनौ, पूर्व प्रधानमन्त्रीसमेत रहेको खनालले भन्नुभयो, अब सबै मिलेर राष्ट्रियता सुदृढ गराउनतिर लाग्नुपर्छ ।’
नेपालमा सामन्तीविरुद्धका आन्दोलनहरु समाप्त भएकाले अब गरिवी, बेरोजगार, निरक्षरता, रोगव्याधी उन्मूलनका लागि अघि बढ्नु पर्ने बताउनुभयो । उहाँले नेपाली संविधानलाई समाजवादी र साम्यवादमा पुग्ने गरी तयारी गर्नुपर्ने बताउनुभयो । माक्र्सवादलाई पढेर नेपाली क्रान्तिलाई अगाडि बढाउनु पर्नेमा खनालले जोड दिनुभयो ।
द्विशतवार्षिकी समारोहका केन्द्रीय संयोजक घनश्याम भूसाल, उपसंयोजक राम कार्की, जनमोर्चाका रश्मीराज नेपाली, नेकपाका देवराज भारले कार्ल माक्र्सको व्यक्तित्वबारेमा बोलेका थिए । समारोहका ५ नम्बर प्रदेश संयोजक ठाकुर गैरेले ३० वर्ष मुनिका दश हजार युवालाई माक्र्सवाद पढाउने बताउनुभयो ।
दुई दिने प्रशिक्षणमा ५ नम्बर प्रदेशका १२ जिल्लाका एक हजार बढी नेताहरु सहभागी रहेका छन् । शुक्रबार मसालका महामन्त्री अर्धभूमिगत नेता मोहनविक्रम सिंहले प्रशिक्षण दिएका छन् । उहाँ उद्घाटन समारोहमा भने आउनु भएन । कांग्रेसका नेता प्रदीप गिरी, नेकपाका घनश्याम भूसाल, गणेश शाहलगायतले पनि प्रशिक्षण दिने आयोजकले बताएका छन् ।
यो समाचार न्युज अफ नेपालबाट लिईएको हो ।
