![](https://usnepalinews.com/wp-content/uploads/2024/07/e0a487e0a49fe0a4bee0a4b2e0a580e0a495e0a58b-e0a4b8e0a4ace0a588e0a4ade0a4a8e0a58de0a4a6e0a4be-e0a496e0a4b0e0a4bee0a4ac-e0a49fe0a58b.jpg)
लन्डन, (एजेन्सी)
स्विट्जरल्यान्डसँग २–० ले हारेपछि डिफेन्डिङ च्याम्पियन इटाली जारी युरो २०२४ बाट बाहिरिएको छ । लुसियानो स्पालेतीको टोली वास्तवमा समूह चरणमै कमजोर देखिएको थियो । क्रोएसियासँगको खेलमा अन्तिम मिनेटमा गोल गरेर इटालीले लाज बचाएको थियो । यही गोलले टोलीलाई अन्तिम १६ मा पु¥याएको थियो ।
इंग्ल्यान्डका पूर्व स्ट्राइकर गेरी लिनेकरले बीबीसी वानलाई बताए—मेरो पुरै जीवनमा हेर्दा इटालीको यो जस्तो खराब टोली अरु नहोला ।
तीन वर्ष अघि अजुरी (इटाली फुटबल टोलीको उपनाम) ले वेम्बली रंगशालामा पेनाल्टी शूटआउटमा जित्दै इंग्ल्यान्डको सपना तुहाएर युरो कप जितेको थियो । टोलीमा प्रतिभावान खेलाडी छन् । तर, उनीहरुले स्विट्जरल्यान्डविरुद्ध कमजोर खेल देखाए ।
यो टोलीमा गत युरोकप जित्ने खेलाडीमा गोलकीपर डोनारुमा, डिफेन्डर जियोभानी डीलोरेन्जो, मिडफिल्डर निकोलो बारेला र फरवार्ड फेडेरिको किसा रहेका छन् ।
इंग्ल्यान्डका पूर्व कप्तान एलेन शिरेरले पनि बताए—तीन वर्ष अघि अदभुत थियो । म त अहिले साँच्चिकै स्तब्ध भए कस्तो खराब इटाली हो ।
इटाली गत विश्वकप २०२२ मा छनोट हुन सकेको थिएन । युरो २०२४ मा छनोट भएर आएपनि इटालीले चार खेल खेल्यो । जसमा, एक खेलमा अल्बानियाले नै तर्साएको थियो । तर, यो खेल जित्न सफल भएको थियो । स्पेनसँग हार्न पुगेको इटालीले क्रोएसियासँग अन्तिम मिनेटमा हार टारेको थियो ।
इटाली युरोकपमा १९६८ र २०२० गरी दुई पटक च्याम्पियन बनेको छ । यस्तै इटाली फिफा विश्वकपमा चार पटक च्याम्पियन बनेको टोली हो । इटालीले १९३४, १९३८, १९८२, २००६ मा विश्वकप उपाधि जितेको थियो । तर, टोली २०१८ र २०२२ को विश्वकपमा भने छनोट हुन सकेन ।
यो समाचार न्युज अफ नेपालबाट लिईएको हो ।