नेपालको आर्थिक विकासका लागि पर्यटन महत्वपूर्ण : प्रचण्ड
रासस काठमाडौँ, २८ चैत | ०१ मिनेट अगाडि
नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले नेपालको आर्थिक विकासका लागि पर्यटन महत्वपूर्ण माध्यम भएकाले यसको विकासमा सामूहिक प्रयास हुनुपर्ने बताएका छन् ।
नेपाल एसोसियसन अफ र्याफटिङ एजेन्सिज (नारा) द्वारा बुधबार आयोजित साहसिक जलयात्रा (र्याफटिङ) पर्यटन : वर्तमान र भविष्य विषयक अन्तरक्रिया कार्यक्रममा उनले प्राकृतिक सम्पदाले भरिपूर्ण भएको नेपालमा पर्यटन प्रवर्द्धनका लागि आवश्यक भौतिक पूर्वाधारको निर्माणमा राज्यको ध्यान केन्द्रित हुनुपर्ने विचार व्यक्त गरे ।
अध्यक्ष दाहालले छिमेकी राष्ट्रहरुलाई मात्र लक्षित गरी निश्चित प्रतिशत पर्यटकलाई नेपाल आउने वातावरण बनाउन सकेमा देशको आर्थिक स्थिति मजबुद हुने विचार राखे ।
नेपाली काँगेसका केन्द्रीय सदस्य गगन थापाले पर्यटन नै देश विकासको मुख्य औजार भएकाले यसको विकासतर्फ सवैको ध्यान केन्द्रित हुनुपर्ने भनाइ व्यक्त गरे ।
त्यस्तै नेपाल पर्यटन व्यवसायी संघका अध्यक्ष दीपक महतले राज्यले नदी नालाको बारेमा छुट्टै नीति बनाउनुपर्ने भन्दै धादिङ जिल्लामा बगेको नदीलाई हाइड्रोको स्वीकृति दिन नहुने विचार व्यक्त गरे ।
ट्रेकिङ एसोसियसन अफ नेपाल (टान)का अध्यक्ष नवराज दाहालले आफुखुसी र्याफटिङ सञ्चालन गर्नेहरुलाई राज्यले नियन्त्रणमा लिनुपर्ने भन्दै र्याफटिङ गर्न लायक स्थानहरुमा जलविद्युत् उत्पादन गर्न नहुने बताए ।
यो समाचार नयाँ पत्रीकाबाट लिईएको हो ।
