सीताराम चौधरी, चन्द्रौटा, कपिलवस्तु
शिवराज नगरपालिकालाई शैक्षिक धरोहरको रुपमा स्थापित गर्न भर्ना अभियानलाई तीब्र बनाउनुपर्ने नगरस्तरीय अनुगमन समिति संयोजक एवं नगर उपप्रमुख शिवकुमारी थारुले जोड दिनुभएको छ ।
विद्यालय उमेरका बालबालिकाहरुलाई विद्यालयसम्म पु¥याउन सबैलाई अभियानमा लाग्नुपर्ने अपिल गर्नुभएको हो । आफ्ना बालबालिकाहरुलाई सामुदायिक विद्यालयमा भर्ना गरी अभियान आफैंबाट शुरुवात गर्नुपर्ने समेत उपप्रमुख थारुले विचार व्यक्त गर्नुभयो । सामुदायिक विद्यालयको शैक्षिक गुणस्तरमा सुधार भएमा विद्यार्थीको स्वतः आकर्षण बढ्ने उहाँले तर्क राख्नुभयो । भर्ना अभियानलाई सफल बनाउन जनप्रतिनिधिहरुको पनि प्रत्यक्ष सहभागिता रहने उपप्रमुख थारुले बताउनुभयो । बालश्रम, बालविवाह एवं विद्यालयको वातावरण छात्रामैत्री नहुँदा भर्ना अभियान सतप्रतिशत हुन नसकेको बताउँदै यसतर्फ सम्बन्धित निकायले विशेष ध्यान दिनुपर्ने उहाँले सुझाव दिनुभयो ।
कार्यक्रममा अध्यक्षताको आसनबाट बोल्दै शिवराज नगरपालिका प्रमुख नेत्रराज अधिकारीले विद्यार्थी भर्ना अभियान न्यूनीकरण मात्र होइन शून्य (०) मा झार्ने दाबी गर्नुभयो । नगरक्षेत्रका सम्पूर्ण विद्यालयको अनुगमन गरी वास्तविक समस्यालाई मध्यनजर गर्दै समाधान गर्ने सिस्टमको विकास गर्ने नगरप्रमुख अधिकारीले विश्वास व्यक्त गर्नुभयो । नगरप्रमुख अधिकारीले शैक्षिक गुणस्तर वृद्धिका लागि सरसफाईलाई पहिलो प्राथमिकतामा राख्नुपर्ने सुझाव दिनुभयो । आयमूलक, ज्ञानमूलक र व्यवहारिक शिक्षामा जोड दिंदै अब शिक्षामा सामाजिक, शैक्षिक र आर्थिक परिवर्तनको खाँचो रहेको उहाँले जिकिर गर्नुभयो ।
“हामी सबैको इच्छा, अनिवार्य निःशुल्क आधारभूत शिक्षा«” यस वर्षको शिक्षाको मूल नारा सहित विद्यार्थी अभियानमा सबैलाई सक्रिय भएर लाग्न स्रोतव्यक्ति देवेश प्रताप सिंहले अपिल गर्नुभयो । अभियानबारे जानकारी दिंदै स्रोतव्यक्ति सिंहले भर्ना अभियान बैशाख २ गतेबाट शुरु भएको बताउनुभयो । उहाँले भन्नुभयो– “बैशाख १४ सम्म विद्यालयमा भर्ना गर्ने र बैशाख १५ देखि ३० गतेसम्म घरदैलो गरी छुटेका बालबालिकाहरुलाई विद्यालयसम्म पु¥याउन पहल गर्नुपर्छ ।”
शिवराज नगरक्षेत्रभित्र अझै ११४ बालबालिका विद्यालय पहुँचबाट टाढा रहेकाले घरघरमा पुगी भर्ना अभियानलाई सफल बनाउन शिवराज नगरपालिका शिक्षा शाखा प्रमुख पूर्ण बहादुर विश्वकर्माले सुझाव दिनुभयो । शिवराज नगरपालिकालाई पूर्ण विद्यालय भर्ना नगरपालिका बनाउन विद्यालय भर्ना अभियानमा विद्यालयका शिक्षक, जनप्रतिनिधिहरु सक्रिय भई लाग्नुपर्ने शिक्षा शाखा प्रमुख विश्वकर्माले बताउनुभयो ।
नगरलाई पूर्ण विद्यालय भर्ना बनाउन विद्यालयको आफ्नो क्षेत्रभित्रका घरधुरीहरुको सर्वेक्षण गर्ने, विद्यालयमा भर्ना भएका विद्यार्थीलाई स्वागत गर्ने, पाठ्यपुस्तक वितरण गर्ने जस्ता कार्यहरु गर्नु पर्ने उहाँले बताउनुभयो । कार्यक्रममा बोल्दै उहाँले भन्नुभयो –“विद्यालय भर्ना पछि ३० प्रतिशत बालबालिकाले विद्यालय बीचमा छाड्ने भएको हुँदा भर्ना गरेर मात्रै नहुने विद्यार्थीलाई विद्यालयमा टिकाइ राख्न विद्यालयले रचनात्मक कार्यक्रमहरु गर्नुपर्छ । आफ्ना छोराछोरीलाई विद्यालय नपठाउने अभिभावकलाई स्थानीय तहबाट पाइने सेवासुविधा रोक्का गरिने हुँदा सबै अभिभावकले अनिवार्य आफ्ना बालबालिकालाई पढ्न विद्यालय भर्ना गर्नुपर्छ ।” देशभरि ४ प्रतिशतभन्दा बढी बालबालिका विद्यालय बाहिर रहेको र यस नगरपालिकामा पनि विद्यार्थीहरु अझै पनि विद्यालय पहँुचभन्दा बाहिर रहेकाले उनीहरुलाई विद्यालय भर्ना अभियान मार्फत विद्यालयमा भर्ना गर्नु पर्नेमा शिक्षा शाखा प्रमुख वि.क.ले जोड दिनुभयो ।
अभिमुखीकरणमा सहभागी विद्यालयका प्रधानाध्यापकहरुले विद्यार्थी भर्ना गरेर मात्रै नहुने विद्यार्थीको सिकाइमा गुणस्तर वृद्धि, आवश्यक भौतिक संरचना, दक्ष जनशक्ति लगानी जस्ता कुरामा नगरपालिकाले ध्यान दिनुपर्ने जोड दिएका थिए । कालिका स्वावलम्बन सामाजिक केन्द्र र सेभ द चिल्ड्रेनको सहयोग तथा शिवराज नगरपालिकाको आयोजनामा सम्पन्न अभिमुखीकरण कार्यक्रममा नगरभित्रका सम्पूर्ण सामुदायिक विद्यालयका प्रधानाध्यापक तथा प्रतिनिधिहरुको सहभागिता रहेको थियो ।
यो समाचार न्युज अफ नेपालबाट लिईएको हो ।
